باپ کی نصیحت

انتساب

یہ ناول میں اس کے نام کرتی ہوں جس نے مجھے نکھارا، میری لکھنے کی صلاحیت کو جلا بخشی اور زندگی کی ہر راہ پر میرا ہمسفر رہا

پیش لفظ

دولت کی تقسیم اور خیر و شر انسان کی زندگی میں اہم کردار ادا کرتے ہیں۔ یہی ہماری زندگی گزارنے کے طریقے کی پہچان ہے۔ جب ہم یہ سوچتے ہیں کہ دنیا میں ہر چیز ہمارے لیے بنی ہے، یہاں تک تو ٹھیک ہے مگر جب اسے پانے کے لیے صحیح اور غلط کی تشریح بھول جاتے ہیں تو ایسی کہانیاں جنم لیتی ہیں ۔

کہانی اس طرح لکھی جائے کہ پڑھنے والا مصنف کا شریک سفر بن جائے تو یہی وہ اصلی فطری اسلوب ہیں جو ایک عام آدمی کو خاص بنا دیتے ہیں۔

میری کوشش ہے کہ آپ کو اچھی تفریح فراہم کرسکوں میری دنیا میں آپ کو خوش آمدید

عابدہ زی شیریں

abidazshireen.com

باپ کی نصیحت

ابرار کا غصے سے برا حال تھا اور ایک انتقامی جذبہ اس کے اندر پنپ رہا تھا، جب لوگ اس کے بجائے اس سے چار سال چھوٹے بھائی امان کی تعریف کیے جا رہے تھے کہ کیسے اس نے والدین کی خدمت میں کوئی کسر نہ چھوڑی۔ آج وہ انہیں کی دعاؤں سے اتنی کم عمری میں ہی ترقی کی کئی منازل طے کر چکا تھا۔ آج ان کی ماں کا چالیسواں تھا، باپ دو ماہ پہلے گزرگیا تھا۔ امان ، جو ابرار سے چار سال چھوٹا تھا، کا غم سے برا حال تھا مگر دوسری طرف تمام انتظامات بھی اسی نے کیے تھے۔ سب لوگ اس کے اچھے انتظامات کی بھی تعریف کر رہے تھے۔

ابرار اور امان کے والد کو بیٹیاں بہت پسند تھیں۔ ان دونوں کی پیدائش سے پہلے ان کی بہن پیدا ہوئی تھی مگر چند دن کے بعد ہی فوت ہو گئی۔ خدا نے دے کر لے لی تو ان کے والد کو بیٹی کا بہت غم ہوا۔ پھر ابرار پیدا ہوا تو والد نے کوئی خاص توجہ نہیں دی مگر وہ ماں کا لاڈلا تھا۔ بیٹی کی وفات کے بعد ابرار اپنی ماں کی بھر پور توجہ اور پیار کا مرکز رہا۔ وہ اس کے بے جا لاڈ اُٹھاتی جس سے وہ دن بدن بگڑتا جارہا تھا۔ وہ سست اور کام چور تھا پڑھائی میں بھی دل نہ لگاتا۔ اگر باپ پوچھتا یا سدھارنے کی کوشش کرتا تو ماں آڑے آ جاتی۔ باپ اپنی بیوی کے آگے بے بس تھا۔ اگر سمجھانے کی کوشش کرتا تو وہ بیٹی کو یاد کر کے رونے بیٹھ جاتی۔ اب باپ کو اپنی غلطی کا احساس ہوا کہ وہ بھی بیٹی کے غم میں کافی عرصہ سوگ مناتا رہا تھا اور بیوی بھی جلد اس غم میں سے باہر نہ آسکی تھی۔ ابرار پیدا ہوا تب وہ بہترہو گئی مگر باپ بیٹی کے غم میں کھویا رہا اور ابرار بگڑتا گیا۔ اب وہ پچھتا رہا تھا کہ کسی بھی غم یا خوشی کو اتنا دل سے نہیں لگانا چاہیے۔ جو مل جائے اس پر شکر کرنا چاہیے اور جو چلا جائے اسے خدا کی کوئی مصلحت سمجھ کر بھلا دینا چاہیے۔ پھر چار سال بعد امان پیدا ہوا تو باپ نے اس پر خصوصی توجہ دینی شروع کی تاکہ وہ نہ بگڑتا جائے۔

امان پڑھائی میں بھی تیز تھا اور ذہانت میں بھی۔ وہ ہر کام شوق لگن اور محنت سے کرتا۔ ابرار اسکول نہ جانے کے بیسیوں بہانے بناتا مگر امان روزانہ اسکول جاتا۔ بارش ہو گرمی ہو سردی ہو چھٹی نہ کرتا۔

ابرار نے بمشکل دس کلاسیں پاس کیں اور آگے نہ پڑھنے کی ٹھان لی۔ آوارہ دوستوں کی صحبت میں وقت برباد کر نے لگا۔ ماں اسے کسی بات پہ نہ پوچھتی نہ روکتی ٹوکتی   باپ سرزنش کرتا تو ماں صفائیاں پیش کرتی۔ پھر وہ محلے کی ایک لڑکی، نعیمہ کے پیار میں مبتلا ہو گیا۔ وہ بہت تیز طرارلڑکی تھی اس نے ابرار سے کہا

اگر فورا میرے گھر اپنے گھر والوں کو نہ بھیجا تو وہ میری شادی کسی اور جگہ پکی کر دیں گئے۔

ابرار نے ماں پر رشتے کے لیے زور دینا شروع کر دیا۔ ماں نے میاں سے بات کی تو اس نے کہا

 اس نکمے نکھٹو کوکون رشتہ کون دے گا۔ اس کی بیوی آئے گی، تو  ابھی تو یہ اپنا بوجھ اٹھانے کے قابل نہیں ہے

ابرار بول اٹھا

"آپ مجھے کوئی نوکری دلوادیں۔ میں کروں گا“

باپ نے جب دیکھا کہ یہ اب اپنی بات سے نہیں ہٹے گا تو اس کی ایک بڑے ادارے میں چوکیدار کی نوکری دلوا دی اور ساتھ ہی اس کی مرضی کی شادی کروادی۔

ابرار کی بیوی نعیمہ بھابھی بہت تیز  طرار تھی ۔ وہ زبان کی نہایت میٹھی مگر اندر سے زہر تھی۔ اس نے سب سے پہلے اپنے بھائی کو کہہ کر ابرار کو ایک سرکاری نوکری دلوا دی۔ وہ اس سے بہت خوش ہوا۔ شادی کے پہلے ہی سال خدا نے اسے ایک پیارے سے بیٹے سے نوازا۔ نعیمہ نے آتے ہی پہلے خاوند کر اپنے قابو میں کیا تا کہ اس کے پاؤں مضبوط ہوسکیں۔

امان کی پڑھائی ختم ہوئی تو وہ ایک پرائیویٹ فرم میں ملازم ہو گیا۔ اچھی کارکردگی دکھانے پر جلد ہی اسے پروموشن مل گیا اور تنخواہ بھی اچھی ہوگئی۔

باپ نے دیکھا کہ امان نہایت رحم دل اور خدا ترس ہے اور اس کی آمدنی بھی اچھی ہے۔ ابرار اور اس کی بیوی اس کو لوٹتے رہتے ہیں کہ وہ ابھی کنوارہ ہے۔ اس نے اس کی شادی کا سوچا۔

بھابھی نے اپنی بھانجی سے اس کی شادی کی بہت کوشش کی مگر اس کی دال نہ گلی اور ایک امیر گھرانے میں اس کی شادی کر دی گئی۔ اس کی بیوی بہت بھولی بھالی تھی۔ وہ کسی کام میں دخل نہ دیتی۔ اس کے دو بچے پیدا ہوئے اور پیدا ہو کر فوت ہو گئے۔ اس پر بھابھی کو موقع مل گیا امان کو روغلانے کا۔ وہ اسے اب ہر وقت بیوی سے بدزن کرتی رہتی کہ یہ کسی کام کی نہیں۔ وہ امیر گھرانے سے آئی ہے، اسے کام کاج بھی نہیں آتا۔ وہ لگا تار اس کے کان بھرتی رہتی۔ امان شروع سے بھابھی کی جھوٹی محبت کو سچ سمجھتا تھا۔ شروع میں اس نے ان باتوں پر زیادہ کان نہ دھرے، وہ اپنی بیوی سے بہت پیار کرتا تھا، مگر قطرہ قطرہ دریا بن جاتا ہے۔ وہ اس سے اکھڑا کھڑا رہنے لگا۔

امان کی قسمت جاگی اور اس کا پرائز بانڈ کا سب سے بڑا انعام نکل آیا۔ جب اسے پتہ چلا تو تیزی سے گھر کو لپکا کہ خوشخبری سب کو سنائے۔ گھر کے باہر اسے اپنے والد مل گئے ۔ انہیں دیکھتے ہی بولا

چلیں مٹھائی لینے چلتے ہیں ۔ سب کو ایک بہت بڑی خوشخبری سنانی ہے“

اس کے والد نے اسے ہاتھ کے اشارے سے روکا اور ایک سائیڈ پر لے جا کر کہا

پہلے اپنی خوشخبری مجھے سناؤ

امان نے ساری بات بتائی تو باپ نے نصیحت کی

گھر میں اس بات کا ذکر کسی سے مت کرنا ۔ تم وہ تمام رقم بینک میں ہی رہنے دو۔ بعد میں سوچ سمجھ کر کہیں بہتر جگہ خرچ کرنا۔ گھر والوں یا کسی اور کو اس کی کانوں کان خبر نہ ہونے دینا۔ اس کو ضائع یا خرچ کرنے کے بجائے بزنس میں لگانے کا سوچو

امان نے باپ کی سب باتوں پر عمل کرنے کا تہیہ کر لیا۔

انہی دنوں امان کا ایک پرانا کلاس فیلو اس سے ملنے آیا۔ وہ بہت امیر تھا اور پاکستان سے باہر سیٹل تھا۔ اسے اب یہاں واپس آنا تھا اس نے امان سے گھر بنوانے میں مدد مانگی۔ امان کے مثبت جواب کے بعد وہ اس کے نقشے کی تیاری کرنے لگے پھر اس نے امان سے کہا  

امان تمہاری نظر میں کوئی اچھی جگہ ہے جہاں میں اپنا گھر بنوا سکوں۔ "

امان نے کہا

" میرے گھر کے بالکل سامنے ایک اچھی لوکیشن پر خالی پلاٹ سیل ہو رہا ہے"

امان کے دوست کو پلاٹ اور اس کی لوکیشن پسند آئی اور اس نے وہ فوراً خرید لیا۔ پھر جب اس پر تعمیراتی کام شروع ہو گیا تو وہ جلدی آنے کا کہہ کر واپس چلا گیا۔

امان کا ایسا ہی اپنا گھر بنانے کا ارمان تھا مگر ابھی وہ پیسے گھر پر خرچ نہ کرنا چاہتا تھا اس لیے اس نے اپنے ارمان مار لیے۔ جب سے اس کے گھر میں بھا بھی آئی تھی ۔ گھر میں اس کا دل نہ لگتا تھا، عجیب سی گھٹن محسوس ہوتی ۔ ماں جو بھابھی کی میٹھی باتوں کی وجہ سے اس کی تعریفوں کے پل باندھتی اور اس کی بیوی کو ناپسند کرتی۔ جب سے اس کی شادی ہوئی تھی گھر کی فضانا ساز گار رہنے لگی تھی۔ وہ کس کی سنتا، بیوی بھی کبھی روتے ہوئے اسے گلہ کرتی تو وہ سخت غصہ کرتا۔ وہ رو دھو کر چپ ہو جاتی۔ اسے اس پر پیار بھی آتا مگر انا آڑے آ جاتی اور وہ اس سے اکھڑا ہی رہتا۔

اس کی بیوی کافی صلح جو تھی، وہ منانے میں پہل کرتی۔ وہ پھر بھی ماننے میں نخرے دکھاتا اور بہت ذیادہ سوری کہلوانے کے بعد مانتا۔ آہستہ آہستہ بیوی نے اسے شکوہ کرنا چھوڑ دیا کہ ایک دم اس کا موڈ بری طرح خراب ہو جاتا اور کئی دن خراب رہتا اور بیوی کو لینے کے دینے پڑ جاتے ۔ پھر وہ اسے طلاق کی دھمکی بھی دیتا رہتا جس سے وہ ڈر کر چُپ ہو جاتی کیونکہ اس کے بچے بھی فوت ہورہے تھے اور اسے یہ بھی ڈر تھا کہ کہیں امان دوسری شادی نہ کرلے۔

حالانکہ امان اپنی بیوی کو صرف ڈرانے کے لیے کہتا۔ وہ خود اس سے بہت محبت کرتا تھا اور اب اسکے بغیر جینے کا تصور بھی نہ کر سکتا تھا۔ باپ اکثر اسے نصیحت کرتا بیٹا بے شک تم خوشحال ہو جاؤ مگر بھائی کی نوکری نہ چھڑوانا ورنہ اسے سستی کی عادت پڑ جائے گی۔ اسے اپنی فیملی کا بوجھ خود اٹھانے دینا۔ اس کی جابجا مدد نہ کرتے رہنا، ہاں اگر وہ واقعی سخت مشکل میں ہو تو ضرور مدد کرنا۔ اگر اس کے بچوں کی تعلیم کا مسئلہ ہو تو بھر پور مدد کرنا تا کہ وہ پڑھ لکھ کر اچھے انسان بن سکیں۔ ہمیشہ مدد بیوی کے ذریعے کروانا، خود نہ کرنا تا کہ وہ اسے بھی اہمیت دیں۔

امان نے احتجاج کیا 

کیوں پاپا بیوی کیوں۔ میرے پیسوں پر میرے گھر والوں کا حق نہیں ہے کیا۔ میں ایسا نہیں کر سکتا 

باپ نے کہا 

بیٹا میں صرف اتنا چاہتا ہوں کہ تم خود ماں کو پیسے دو مگر اتنے جتنے اس کی ضرورت ہے۔ فالتو پیسوں سے وہ اپنے دوسرے بیٹے کی مدد کرتی رہے گی اور انہیں بگاڑ دے گی۔ پیسے دینے ہوں تو اپنی بیوی سے بھابھی کو دلاؤ، بھائی کو نہ دو تا کہ ابرار کی بیوی کو بھی فضول خرچی کی عادت نہ پڑے۔ اس طرح وہ تمہاری بیوی سے بھی بنا کر رکھے گی اور لڑائی نہ ہوگی، ورنہ وہ تم سے صلح میں رہے گی اور تمہاری بیوی کو اہمیت نہ دے گی اور اس سے لڑتی رہے گی۔ ہو سکتا ہے تمہاری بیوی بھی تنگ آکر تمہیں چھوڑ دے کیونکہ وہ امیر والدین کی بیٹی ہے۔ وہ اسے آرام سے پال سکتے ہیں۔  

امان ڈر گیا، اس نے تو کبھی اس پہلو پر سوچا ہی نہیں تھا۔ اگر وہ اسے چھوڑ گئی تو وہ جیتے جی مر جائے گا۔ اس نے باپ کی نصیحت پر حرف بحرف عمل شروع کر دیا۔ اس طرح سے واقعی اس کی بھابھی اب اس کی بیوی سے میٹھی بن کر رہنے لگی۔